An naɗa tsohon shugaban Al-Shabab a matsayin minista a Somaliya

An naɗa tsohon mataimakin shugaba kuma mai magana da yawun ƙungiyar al-Shabab ta Somaliya a matsayin ministan ƙasar.

An zaɓi Mukhtar Robow a matsayin ministan harkokin addini a sabuwar majalisar ministoci ta Somalia.

Ƴa daɗe a cikin ɗaurin talala na tsawon shekaru hudu bayan da aka kama shi a lokacin a mulkin tsohon shugaban ƙasar, saboda ya shirya wata ƙungiyar ƴan bindiga.

An kuma zarge shi da rashin yin watsi da tsattsauran ra'ayi.

An kashe fiye da mutum 20 a lokacin da tashin hankali ya ɓarke bayan an kama shi.

Ya bar ƙungiyar al-Shabab a shekarar 2015 inda yake kafa hujja kan bambancin aƙida, sai ya buɗe tasa ƙungiyar ƴan bindigar.

Akwai lokacin da Amurka ta sanya sunansa a jerin waɗanda ake nema saboda ayyukan ta'addanci.

Ta yi tayin bayar da dala miliyan biyar ga duk wanda ya kama shi, amma an yi watsi da wannan batu a shekarar 2017.

Naɗa shi a matsayin ministan harkokin addini yana iya ayyana yaƙin adawa da aƙidar al-Shabab.

Amma wasu suna ganin kamar an yi hakan ne don rufe laifukan da ya yi lokacin da yake da alaƙa da ƙungiyar al-Qaida.

Ƙungiyar al-Shabab, wadda ke adawa da gwamnatin Somaliya da ke samun goyon bayan ƙasashen duniya, na kai hare-hare akai-akai a Somaliya.

Sannan takan kai hari har a kasashen da ke maƙwabta da ita.

BBC Hausa